Arctic Open: Miðnæturgolf undir miðnætursól

Mótið er haldið dagana 22-24 júní 2023. Við viljum vekja athygli kylfinga á því að opnunarhátíðin er haldin á fimmtudegi fyrir fyrstu rástíma og því er engin dagskrá á miðvikudegi.

Það er sem draumur hafi ræst, segja kylfingar sem tekið hafa þátt í Arctic Open golfmótinu á Akureyri. Enda er það draumi líkast og einstök upplifun að spila golf í blóðrauðu sólarlagi um miðnæturbil svo nærri heimskautsbaugi. Stemningin í kringum mótið er engu lík og þátttakendur eiga ógleymanlegar stundir í góðra vina hópi.

Arctic Open er alþjóðlegt golfmót sem hefur fest sig í sessi síðan það var fyrst haldið árið 1986 en það ár var einungis keppt í einum flokki, þ.e.a.s. með forgjöf.

Kylfingar sem hafa notið miðnætursólar á Arctic Open í gegnum tíðina hafa komið víðsvegar af landinu og frá öllum heimshornum. Þeir ljúka allir sem einn lofsorði á skipulag mótsins sem er í raun fjögurra daga golfhátíð, 36 holu golf þar sem leikið er eftir Stableford punktakerfi. Sjálfir keppnisdagarnir eru tveir og spilaðar 18 holur hvorn þeirra.
 Nánari upplýsingar